Die Peter-jasie Patriot

 

Nommer 11

'n Passie vir Afrikaans

12 Desember

Dagsê!

Daar is twee mense vir wie ek GROOT bewondering het, die een sing en die ander skryf, Nianell sing en Minette skryf, albei verskaf my groot lekkerkry. Ek kan nie een van die twee doen nie, vandaar die bewondering. Ook, albei is of was van Namibië. Nog iets wat hulle in gemeen het is dat ek hulle "vriende " kan noem. Nog nie vir Minette persoonlik ontmoet nie, maar ek glo sy is net so "down to earth" as Nianell. (Wat is down to earth  in Afrikaans?)

In elk geval, ek sien vanoggend Minette se naam in my inkomende epos ek ek maak haastig oop, en daar sit hulle, sommer 'n hele paar aanhangsels, ek het weer leesstof! Ek gaan kry vir my 'n yskoue glas Cola Tonic en maak die aanhangsels een vir een oop.  Haar onderwerpe is alledaagse gebeurtenisse, dinge wat ons amal daagliks oorkom maar nooit sal dink om daaroor te skryf nie. Minette skryf daaroor, en sy doen dit goed! Hier is een van haar artikels, die ander is op die webblad, gaan kyk gerus, en laat haar weet dat julle dit gelees het en dit geniet het, ek is seker julle sal. Ek sien sy gebruik die Afrikaanse woord, "vloermoer" vir tantrum. Nogal heel beskrywend!

Kinderpartytjies
OP universiteit word dramastudente die volgende waarheid geleer: ‘There is a hell where actors go to. It’s called Children’s Theatre.’
Dit is vir enige aspirant-akteur die grootste toets en as jy dit kan deurstaan, kan jy enige iets in die lewe aanpak. Vir weke repeteer jy van vroegdag tot lank na middernag aan ‘Miranda en die Towerspons’. Jy verloor sewentien kilogram in die proses want soveel energie word selde indien ooit in enige sportsoort op aarde verbruik. Jou kostuum maak egter op vir die verlies aan massa, veral as jy die rol van Gem die Seester, die Ondersese Haarkapper, vertolk. Jy staan die helfte van die verhoog vol met die punte van die seester wat in alle windrigtings swaai. Maar jy moet die marteling deurgaan om jou tweede jaar deur te kom en daarom verduur jy dit met ‘n dramatiese glimlag –- jy is immers die groot drama queen.
Tydens die laaste twee kleedrepetisies kry die res van die dramadepartement die geleentheid om die produksie te beoordeel en die gemarteldes op die verhoog ‘n idee te gee van gehoorreaksie. En jy dink 'ons het alles onder beheer.'
Maar helaas.
Die oomblik wanneer die gordyne lig en REGTE kinders sit in die gehoor, dan bars alle hel los.
Dis ‘n gegil, ‘n geskree, ‘n geboe, ‘n malende kindermassa wat selfs tot op die verhoog spring en tussen dit alles deur moet jy konsentreer op jou woorde en om jouself hoorbaar bo die kakofonie te maak. Jy vergeet egter in die proses van die Seesterkostuum en klap per ongeluk ‘n kind bo van die verhoog af met die laaste stuiptrekkings van die Seester Tango. Almal gil histeries, onderwysers inkluis, en jou oog vang dié van jou dosent wat woedend vir jou van die gallery af gluur. ‘Gaan aan! Gaan aan!’ beduie hy kwaai en die Seester is vir die res van die vertoning die ongewildste onderwater karakter. Nie baie goed vir die ego of die jaareindpunte nie. Gelukkig het die kind nie blywende skade opgedoen nie en het die betrokke skool ook nie die Seester gedagvaar nie.
Nou is my studentedae ‘n gawe herinnering, maar die hel het nou ‘n nuwe naam: KINDERPARTYTJIES.
Ek vergesel my jongste na ‘n Liewe Heksie-partytjie en noem by voorbaat vir die mamma dat ek ‘n bietjie aan die olike kant voel –- ‘ons het net gesig kom wys.’ Dan sleep ek ‘n stoel nader en gaan sit in die skadu van ‘n lieflike boom.
Dit is nie so erg nie, dink ek. ‘n Heerlike wintersoggend, al die veld is vrolik en al daai dinge. Totdat vierhonderd kindertjies om die draai gevlieg kom en histeries op die springkasteel begin hop.
Ek hou hulle vir ‘n rukkie dop en kom dan agter dat my maag begin draai van al die op- en affery hier reg voor my. Ek retireer met stoel en al, weggekeer van die hoppery. Maar ‘n skoot sand tref my vol in die gesig want ek sit binne in die sandput. Dan skuif ons maar weer. Die keer trek ‘n duisend fietsklokkies los want ek blokkeer die deurgang van die ryers wat om die visdam trap.
Intussen gooi my kind ‘n super deluxe vloermoer omdat sy nie die verjaardagmeisie se presente mag oopmaak nie en al die ander mammas met die voorbeeldige kinders kyk ons met sulke ‘dankie-vader-dis-nie-my-kind-nie’ ogies aan. Toe gaan ons maar huis toe net na die ‘veels geluk liewe maatjie’-singery. Alhoewel ek in Milan se oë kon sien dat die maatjie alles behalwe lief is.
Nou wonder ek maar net, gaan ek eendag groter hel hê as dit by TIENERPARTYTJIES kom?
Die wat weet, moet maar laat weet…

 

Skakels

Peter-jasie


Boererate


Aardklop


Stormpies


Danville Hulpgroep


Boeremusiek


Nianell


 

'n Tikkie Humor

WAARHEDE, NAARHEDE .....

Daar's twee soorte mense by 'n partytjie, die wat wil ry, en die wat wil bly.
En gewoonlik is hulle met mekaar getroud.

Al ooit opgelet hoe baie verliefdes met toe oë soen ?
Ongelukkig gebeur dit dikwels dat hulle ook so trou.

Daar's net 3 maniere om huistakies te verrig :
Soos 'n BEJAARDE : stadig.
Soos 'n VOLWASSENE : deeglik.
Soos 'n TIENER : glad nie.

Siekefondse is nes 'n hospitaaljurk : jy dink maar net jy's ten volle gedek.

Sommige vroue dink bikini's is onbehoorlike drag.
Ander het weer die figuur daarvoor.

Voor haar troue sweef 'n vrou in die wolke.
Na haar troue sit sy haar voet neer.

Vroue jok oor hul ouderdom.
Mans oor hul salaris.

Dis altyd die laaste sleutel aan die bos wat die deur oopsluit.

Jy weet jou dogter is besig om groot te word as sy stadig begin aantrek en vinnig geld bestee.

Snaakse ding 'n hoender. Dis al dier wat jy kan eet voor hy gebore word en na hy dood is.

'n Vrou se mond is nes 'n stukkende garagedeur.
Jy sukkel jou gedaan om hom toe te kry.

Meisies wat bril dra, kan net so aantreklik wees soos die wat nie bril dra nie.
Dit hang net van hul raamwerk af.

'n Skinderstorie is nes 'n eier - as hy eers uitgebroei het, kry hy vlerkies.

As 'n man rats spring om die motordeur vir 'n vrou oop te maak, kan jy maar weet dis of 'n nuwe vrou of 'n nuwe motor.

Piekniek is vir kinders ...en miere

Afrikaanse Skakels

RSG


Kyknet


Eg Afrikaans


Die Knoop


Wat kyk jy


Wenke wat Werk


Minette Brink


Die Resep

Hierdie resep kom van Anna Eksteen se uitstekende aflaaibare resepteboek, Vir meer uithaler Suid Afrikaanse resepte soos die een, kontak Anna soos volg:
Sel: 0822946799

Mens wil mos altyd hê dat jou braai anders moet wees, wel, probeer die krummelpap-variasie, dit maak van die geleentheid miskien iets spesiaals!
 

 
KRUMMELPAP VERRASSING:

4 x 250ml krummelpap
500ml bruinbroodkrummels
5ml sout
250g botter
500g bladspek
500ml melk
8 eiers, geskei
285g blik geroomde sampioene
285g blik gesnipperde sampioene, gedreineer
500ml Chedderkaas, gerasper
170g blikkie ingedampte melk

Voorverhit die oond tot 180C en smeer 'n oondskottel. Meng die krummelpap, brood krummels en sout, voeg die gesmelte botter by en meng goed. Braai die spek bros en krummel dit. Hou 'n bietjie van die spek vir garnering en voeg die res van die spek by die krummelpapmengsel. Klits die melk en eiergele saam en voeg dit en die sampioene en 350ml van die kaas by die mengsel. Skep dit in die oondskottel uit en bak dit vir ongeveer 'n uur lank. Sprinkel die res van die kaas en spek bo-oor en gooi die ingedampte melk oor. Plaas die gereg vir ongeveer 5 tot 10 minute terug in die oond. Bedien saam met braaivleis.

 
 

Brokkies

Danville Kersboom

Die groot dag breek aan en ons is al vroeg daar! Terwyl ons die kerstak opmaak (Die boom wat toe 'n groot tak, kon nie 'n Kersboom kry nie. Dit het nou wel nie 'n boomvorm gehad nie, maar dit was groen en ons kon versiersels aanhang!) begin die kos en koeldrank by die bakkievol daar aankom. Die springkastele hou die kinders solank besig. Toe is die saal toe vir samesang 'n Kerstoneel deur die kinders en modeparade deur die ouers. daarna die groot eet, en toe kom Kersvader daar aan, en vir die kinders was die dag volmaak!  Volgende jaar maak ons weer so!

(Kersboom en kinders se wenslys) (Die Danville Hulpgroep) (Kersboom)

Argiewe

 
 
 
 

 
Illustreerder

Ek soek iemand om 'n tekenprent te illustreer, ek gee die idee en die teks en jy teken, ek bemark dit en ons deel  winste, indien enige. Dit gaan pret wees, kontak my

 
.Ek sal enige terugvoer en/of voorstelle waardeer!. dankie - Peter  
 

Druk jou speld op my besoekerskaart!

 

Kontak - Teken in/uit

Epos: peter@funkymunky.co.za
Teken in en uit onder aan hierdie bladsy: Peter-jasie