Die Peter-jasie Patriot

Nommer 31

'n Passie vir Afrikaans

21 Mei

Dagsê!

My gunsteling Suidwester, Minette,  het nog artikels vir my gestuur, hieronder is een en hier is nog meer!

Lag tog meer...

TUSSEN al die gemorspos wat ‘n mens elke dag kry, is daar party kere een wat die moeite werd is.
Ek kry die ander dag een van vriend A.W. en met apologie aan die oorspronklike skrywer wil ek hopelik meer as een persoon laat glimlag.
“Twintig maniere om ‘n hoë vlak van geestesongesondheid te handhaaf:
Sit oor jou etensuur met ‘n donkerbril op in jou motor en mik met ‘n haardroër na die aankomende verkeer. Kyk of hulle stadiger ry.
Roep jouself oor die interkom sonder om jou stem te vermom.
Elke keer as jou baas jou vra om iets te doen, vra of hy skyfies daarmee saam wil hê.
Vervang die filterkoffie in die koffiepot vir drie weke met ‘decaf.’ Sodra jou kollegas oor hulle kaffeienverslawing is, hervul die pot met espresso.
Begin al jou sinne met ‘in ooreenstemming met die profesie.’
Moenie loop nie. Huppel.
Vra vir mense wat hulle geslag is. Lag histeries sodra hulle antwoord.
Sing kliphard saam by opera-uitvoerings.
Span ‘n muskietnet om jou werksarea en speel die hele dag CD’s met tropiese woudgeluide.
Wanneer jy geld by die OTM trek en dit word uitgereik, skree, “Ek het gewen! Ek het gewen!”
Woon ‘n poësie-aand by en vra na elke voordrag waarom die gedigte nie rym nie.
Laat weet jou gasheer vyf dae voor die partytjie dat jy nie meer kom nie, want jy is nie in die regte bui nie.
Sê tydens aandete vir jou kinders dat jy weens ekonomiese redes een van hulle moet laat gaan.”
Die lewe is te kort om permanent met strak gesigte rond te steier. Al is die grappies vir party flou, moet ‘n mens nooit ophou om die humor in situasies raak te sien nie. Daar is genoeg swaarkry, hartseer en ellende in die wêreld en al hoe ons semi-normaal kan bly, is om te lag.
Dit sal nie help om maagsere te ontwikkel oor honger kinders, swak finansies en verlore liefdes nie.
Kinders is ook altyd ‘n goeie bron van vermaak en ‘n mens kan gerus meer aandag gee aan die goed wat hulle party kere kwytraak.
Ek kuier een aan by ‘n vriendin wat nou en dan ‘n dun sigaar na ete waardeer. Ons sit buite op die stoep en gesels terwyl die kinders die huis afbreek.
Vriendin se vierjarige dogtertjie kom staan in die deur en bekyk ons met sulke alwetende ogies.
“Julle gaan sterf,” kondig sy smalend aan. Die gesprek word kortgeknip.
“Ja my ding,’ sug haar ma. “Ons gaan almal eendag sterf.”
Dingetjie lig haar wenkbroue. “Nie eendag nie. Nou.”
“Hoe so,” vra ons.
“Daai gisaartjies van julle…” En sy loop kopskuddend en bitter beswaard weg. Ons het toe maar die gisaartjies doodgedruk, al was ons dik van die lag.
My jongste is altyd aan die sing en die ander dag hoor ek die uit volle bors weergawe van ‘n liedjie waarvan die wysie vaagweg bekend klink, maar die woorde is nie so lekker nie.
“Watter liedjie is dit,’ vra ek.
“Bê-nuh-sistelien, duh-simpe-bê-nuh-sistelien,” sê sy met ‘n ma-is-nie-te-bright-nie-né oge.
Ek het nie ‘n idee waarvan sy praat nie, maar na ‘n verduideliking van ‘daai vet beer en die arm kind met die lap om sy lyf wat so deur die woud met die skelm slang met die draai-ogies dans,’ gaan die lig op.
“Aaa! The Bare Necessities van Jungle Book,” juig ek.
Sy is ‘n rukkie stil.
“Moenie grappies maak nie. Dis wat ek gesê het. Bê-NUH-SISTELIEN!” Sy loop vies weg.
Daar het jy dit.
Nou gebruik ek nie meer kragwoorde nie. Ek “bê-nuh-sistelien!” vir almal wat my kwaad maak en dan gaan die woede sommer vanself weg.

Stuur vir Minette Epos as julle van haar artikels hou, waardeer enige terugvoer!

'n Tikkie Humor

Die kunsskilder was besig om buite teen 'n heuwel, op doek ‘n landskap te skilder terwyl die plaasboer oor sy skouer kom loer het om te sien hoe sake vorder. Hy vra aan die boer; “Miskien het jy ook waardering vir die pragtige dinge in die natuur. Die lang goue vingers van dagbreek wat oprys oor die oosterkim, die rooi gevlekte, swaelkleur eilandjies in ‘n meer van vuur teen
sonsondergang, die wolke soos drake wat teen middernag die bleekwit maan verslind”. “Nee” sê die boer; “nie onlangs nie, maar dan het ek al ‘n jaar lank opgehou met drink”

Toe ek klein was, het ek gedink my naam is Sherrap
 

‘n Agtjarige dogtertjie het die volgende opstel geskryf oor Mense:
Mense bestaan uit meisies en seuns en mans en vroue. Seuns is niks werd nie totdat hulle trou. Seuns maak aaklige broers. Hulle wil alles hê behalwe seep. My Ma is ‘n vrou en my Pa is ‘n man. ‘n Vrou is ‘n meisie wat groot geword het en kinders het. My Pa is ‘n goeie man en ek dink hy was ‘n meisie toe hy klein was.

Grappe hierbo kom van Gerhard se Grapkas Teken in op sy weeklikse grapbrief, stuur 'n Epos aan griesel@futurenet.co.za  met
STUUR in die onderwerplyn

Geldmaak op die Internet?? Virseker!

Die Resep

Gebakte karringmelkpoeding

Bestanddele:
1 koppie Meelblom                        2 Eiers
1 koppie Karringmelk                    2 eetlepels Botter
½ koppie Suiker                           2 gelyke teelepels Bakpoeier

Metode:
Klits botter en suiker so goed moontlik, voeg eiers by en klits weer goed, voeg nou die karringmelk en meelblom beurtelings by. Roer nou die bakpoeier by. Poeding word op die gewone manier gebak

Let wel: Dikmelk kan in plek van karringmelk gebruik word.
 

Afrikaanse Lied

Dit en dat....

Studiebeurse
Glo dit ofte nie, maar internasionale maatskappye stel  letterlik honderdduisende studiebeurse beskikbaar vir enigiemand wat wil gaan studeer! En jy hoef nie eers te soek daarvoor nie, dis alles in een gids beskikbaar. Ook vir Suid-Afrikaners! Maar moenie my glo nie, gaan kyk self!

Druk jou speld op my besoekerskaart!

Kontak - Teken in/uit