Nommer 88

Afrikaans KOOK!!!

15 Maart 2006

Welkom aan alle nuwe intekenare!

Die volgende Patriot gaan later as gewoonlik uitgestuur word, ons gaan eers bietjie rondry en daar gaan nie geleentheid wees om dit in 2 weke se tyd uit te stuur nie, so byt maar vas, as hy weer uitkom gaan daar baie fotos van ons reise wees. Dalk is e trug by die middel April, ons sal maar sien. Dis die lekker van afgetrtee te wees, jou tyd is jou eie!

Estelle de Bruyn is ook verbonde aan die Republikein, die enigste Afrikaanse dagblad in Namibië. Stuur gerus vir Estelle epos as jy van haar artikel hou, sy sien uit om van julle te hoor!

Daar’s ‘n slang in die gras in die nuwe, groen Genesis
Estelle de Bruyn

AS ek Eva was, het ek self my vyeblaartjies gepak en uit die Paradys padgegee. Dis nou te sê ná die episode met die slang.
Tydens my luilekker vakansietjie hang ek een oggend maar rond en begin in my studeerkamer vroetel en regpak en weggooi. Met ’n bondeltjie weggooigoed in my arms stap ek op pad deur die kombuis na die buitenste asblik in die garage.
Met die intrapslag in die kombuis steek ek vas. Iets is fout. Ek is beslis besig om te hallusineer, want die teëlvloer in die kombuis beweeg. Ek knip-knip my oë, fokus mooi en sien dis nie die vloer wat beweeg nie, maar ’n lang slang wat besig is om daaroor te seil in die rigting van die garage.
Ek weet ek het nie gevloek nie, maar ’n oerkreet van verskrikking en walging het uit my binneste ontsnap en toe dit my ore bereik, my teruggeruk het na die werklikheid. Gevries, versteen het ek bly staan tot die slang uit die kombuis en in die garage was. Soos ’n regte Liquorice All Sorts-mannetjie rek ek my byna uit lid uit en kry die deur toe waardeur die slang weggeseil het.
Met bewende vingers bel ek my slimme kollegas by Republikein wat ver beter as ek weet wat om in krisisse te doen. Hulle stuur onmiddellik die dapper Dirk Heinrich van Allgemeine Zeitung, wie ’n natuurkenner by uitnementheid is, tot my redding. Ek wip by die voorhek uit om hom in die straat in te wag en daar kom ek wederom vir slang se kind teë. Dié het intussen onder die garagedeur uitgeseil en lê voor die deur in die oggendson. Ek koers straat toe om Dirk te keer dat hy nie moet inry en die slang weer binnetoe jaag nie.
Minute later stop Dirk en Minette voor my deur. Bewend, grillend wys ek waar ta lê en die dapper Dirk stap kordaat nader en vang die slang met sy kaal hande.
My hele lyf van kop tot tone is die ene hoendervleis, ek gril soos ’n mens maak wanneer iemand met sy naels oor ’n swartbord krap. Dirk stap die berge in en laat die slang vry.
Gmf! dink ek, laas toe ek Genesis gelees het, sou die slang jou aan die hakskeen byt en jy moes sy kop vermorsel. Maar nou ja, Genesis is voor eko-vriendelikheid eers ’n gedagte by die eerste bewaringsbewuste was, geskryf.
“Dis ’n baba-sweepslangejie,” paai Dirk. “Hy kan jou niks aandoen nie en is waarskynlik banger vir jou as wat jy vir hom is.”
Dit bring geen gerusstelling nie. As dit ’n baba is, waar is sy ma en pa en boeties en sussies, wonder ek.
Wat is dit dat ’n mens (okay, sommige van ons dan) so ’n oervrees vir die seilende gedoentes oorgehou het? Miskien beteken dit dat ek nie veel hoër as die tweede sportjie op die evolusieleer geklim het nie en diep binne my nog daardie swart vrees vir die vreemde en onbekende van ons grotbewonende Neandertal-voorsate koester.
Deesdae stap ek nie meer kaalvoet in my huis rond nie, maar sorg dat my hakskene toe is; ek klim nie in die bed nie, maar spring van ’n afstand af op, ingeval Swepie se ma en pa en familie dalk onder die bed skuilhou.
Kry ’n meerkat, slange is bang vir hulle. Gooi chloorpoeier om jou huis want dit skrik slange af, kry ek raad.
Vermorsel sy kop.... as jy moed genoeg het om dit so na aan hom te waag, dis al wat ek glo.

Die volgende kom van Julanda van Swakopmund, baie dankie!

Die Super 14 uit 'n vrou se oogpunt!

Maak nou maar vrede daarmee dat jy die man in jou lewe vir die volgende paar maande tydens naweke aan rugby moet afstaan.

Moenie dikbek en bakleierig raak daaroor nie. Probeer liewer moeite doen om die belangstelling met hom te deel.

Wat jy moet weet:

Vanjaar se toernooi is die Super-14. Die Super-12 is sóó laasjaar.

Dis die Super-14, maar daar is 15 spelers in 'n span. Die 14 verwys na die hoeveelheid spanne wat deelneem, nie die hoeveelheid spelers nie.

Hoewel daar 15 spelers in die span is, is daar veronderstel om 31 mense op die veld te wees. Dit is twee spanne van 15 elk, en die skeidsregter ( ref ) - hy is die ou wat 'n ander kleur trui aanhet as die res van die ouens en die een wat die fluitjie aanhoudend blaas sodat die spelers kan rus.

Hoewel daar 15 spelers in 'n span is, help dit nie jy probeer hulle name uit jou kop uit leer om manlief te beï ndruk nie. Die kans is 100% dat vier of vyf van hulle iewers gedurende die wedstryd die veld gaan verlaat en deur iemand anders vervang gaan word.

Kaartjies is gewoonlik goeie nuus. Soos Valentynskaartjies, verjaarsdagkaartjies, fliekkaartjies. Maar in rugby is kaartjies slegte nuus.

'n Gele beteken die ref is vies vir iemand en stuur hom vir 'n rukkie af. 'n Rooi kaart beteken moeilikheid. Groot moeilikheid. Die ref is nou kwaad. Jy gaan daardie knaap wat die kaartjie kry vir die res van die wedstryd nie weer sien nie.

Suid-Afrika het vyf spanne in die toernooi. Die Bulls is van Pretoria, maar hulle is nie die Blou Bulle nie. Die Cats is van Johannesburg, maar hulle moenie verwar word met die kwaaikatte van die Vrystaat, wat die Cheetahs is nie. Die Stormers is van die Kaap ( Kaap van Storms) en die Sharks is van KwaZuluNatal en noem hulle tuisveld die Shark tank .

Jy jy sukkel om by te bly met jou vriendinne se lys van kêrels . . Moenie eers probeer om 'n span te identifiseer net omdat jy iemand op die veld sien wat jy van verlede jaar onthou nie.

Moet byvoorbeeld nie die Bulls speel as jy 'n outjie met die naam Tiaan Snyman sien skop nie. Hy het voorheen vir die Blou Bulle gespeel, maar speel nie hierdie jaar vir die Bulls nie, maar wel vir die Stormers. En Percy Montgomery lui dalk 'n Stormer-klokkie by jou, maar hy draf deesdae uit vir die Sharks.

Vrae om nie te vra nie

· Ná rustyd: "Hardloop hulle nie nou verkeerde kant toe nie?"

· Terwyl Naas Botha besig is om te verduidelik wat die probleem in Suid-Afrikaanse rugby is: "Liefie, mag 'n speler skepskop van 'n vryskop sonder dat 'n speler van die ander span aan die bal geraak het?"

· Wanneer manlief se span onder aan die lys van Super-14-presteerders is: "Verduidelik gou weer vir my wat beteken relegasie?"

· "Wen ons?"

Opmerkings om nie te maak nie

· "Oe, maar daai nommer tien het mooi boudjies!"

· "Haai kyk, Percy het weer 'n ander haarkleur. Dink jy nie Coert hier onder by Hêr Desaain sal joune ook so kan kap nie?"

'n Manlike kollega wat alles van rugby af weet, sê rugby is oorlog. Dit beteken jy mag niks, absoluut niks oor kosmetiese kwessies sê nie. Niks oor haarstyle of skouerkussings nie.

"Voor jy enigiets sê, vergewis jou van die telling. As die Suid-Afrikaanse span nie voorloop nie, bly stil," verduidelik hy.

"As die Suid-Afrikaanse span wel voorloop, mag jy praat. Die reël oor die kosmetiek verval dan op die plek en 'n opmerking oor iemand se hare ï s toelaatbaar."

'n Groot, groot nee: "Hoekom speel die spanne van Australië soveel beter as ons spanne?"

Dinge om nie te doen nie

· As die eerste helfte van die wedstryd verby is, weerhou jou daarvan om op 'n Vrydagaand vinnig oor te skakel na Noot vir Noot . Dit is helse sonde. Nie Noot vir Noot nie, maar om die kommentaar van die kenners in die ateljee te mis.

· As jy planne het om die speeltyd te laat oorloop na ekstra tyd deur vir jouself 'n rugbytruitjie te koop vir die slaapkamer, maak in hemelsnaam seker daar staan nie iets soos Brumbie of Chief op die stukkie kleertjie nie.

As dit 'n gekuier raak

· Wees bly as hy 'n paar vriende wil oornooi vir 'n wedstryd. Jy wil tog nie hê hulle moet liewer iewers in 'n kroeg voor 'n platskerm aan die suip raak nie, of hoe?

· Berei lekker happies om vooraf en rustyd te bedien. Vergeet van vrugtesosatietjies en soesjierige goetertjies. Tjips, biltong, pretzels en 'n lekker dip sal die ding doen.

· Ná so 'n game is 'n ou honger. Pap, sous, braaibroodjies, aartappelslaai, 'n paar tjops en 'n stukkie wors sal goed afgaan saam met 'n koue Germaanse bruisdrankie.

En as sy span gewen het, skink maar vir jouself ook 'n versterkwatertjie, want dit beteken hy gaan die game weer môreoggend kyk op die heruitsending. En oormore se kuier by jou ouers is dan van die baan, want dit val saam met die uitsending van die afgelope naweek se hoogtepunte.

Moenie moed verloor nie. Wees geduldig.

Tel tot 14. 

Sopas nog 'n boodskap van Elsabe van die anville Hulpprojek gekry. As julle enigsins kan, help asseblief vir Elsabé en haar span, hulle doen wonderlike werk. Ek staan verstom oor wat sy kan vermag! Mense het byvoorbeeld verblyf nodig en sonder om te aarsel bestel sy 'n Wendyhuisie sonder 'n sent om daarvoor te betaal. En keer op keer is die geld beskikbaar wanneer dit by betaaltyd kom! DIS nou vir jou geloof!

11 Maart 2006

Goeiemôre vriende,

Hoe sê 'n mens DANKIE? BAIE BAIE DANKIE aan almal wat gehelp en bygedra het om ons projek weer op die been te kry.

BAIE DANKIE vir julle ondersteuning en bemoediging toe ek moedeloos wou word! Die laaste 3 weke was sekerlik die moeilikste in ons projek se leeftyd!

BAIE DANKIE vir julle groot naasteliefde. Ons kon al ons verpligtinge nakom en ek het 'n hele 1 ton bakkie propvol met kruideniersware versprei! Wat 'n vreugde en voorreg was dit om weer 'n massa kruideniersware te kon gaan aankoop. Elke artikel wat ek van die rak afgehaal het, het die liedjie "How Great Thou Art" meer en meer betekenis gegee. Nogmaals baie dankie.

Nog goeie nuus hierdie week is dat ons projek nou ook as 'n Artikel 18a geregistreer is. M.a.w. Geldelike donasies aan ons projek kan nou van jou persoonlike belasting afgetrek word. (Belastingverligting!!) Ek sal later meer inligting hieroor gee asook 'n uittreksel uit die SARS dokumente hieroor. So indien jy belastingprobleme het - Die Danville Hulp Projek is nou jou antwoord!!! - wonderlik nê??

Alhoewel ons nou hierdie maand ons verpligtinge kon nakom wil ek net vra dat almal ingedagte sal hou dat ons op 'n deurgaande basis ook donasies van kos, klere, meubels en enige goeie bruikbare artikels nodig het.

Die winter is alweer om die draai en met hierdie koue spel wat ons gehad het, het ek besef dat dit alweer tyd is om warm klere en komberse te begin bymekaar maak! Kom dames - daardie klerekaste moet omgeruil word - en - onthou dit wat jy nie die laaste 6 maande gedra het nie, gaan nie weer maklik gedra word nie!!! Dus gooi maar uit - daar is iemand daarbuite wat dit bitter nodig het.

Ons weet natuurlik dat al hierdie blessings wat na ons kant toe gekom het en nog steeds kom suiwer aan ons Hemelse Vader te danke is! Sonder SY groot genade is ons verlore.

Ek hou julle op hoogte van al ons aksies en vordering.

Gaan loer gerus in op ons webwerf: www.danvillehulp.co.za en geniet die foto's van al ons projekte.

Mooi dag en nogmaals baie, baie dankie.

Elsabé  (Kontakbesonderhede ondertoe)

Vlooimark

Ek word gereeld gevra of ek bereid sal wees om op my webwerf te adverteer.  Kom ons kyk of dit aftrek sal kry, klik op die skakel hieronder en plaas jou gratis advertensie of snuffel maar net rond.

 
Suid Afrika se Afrikaanse soekenjin

ePos Vriende - In die ou dae voor die internet het ek vele penvriende regoor die aardbol gehad. Jy moes weke wag vir 'n antwoord op jou brief! Vandag, met ePos gaan dinge sommer blitsvinnig! Mens moet egter in baie gevalle betaal om jou naam op 'n penvriend lys te kry. Ek glo nie daarin om vir vriendskap te betaal nie, dus gaan ek 'n gratis "ePos Vriende" afdeling begin. Al wat jy hoef te doen om jou gegewens op die lys te kry is om HIER te klik en jou besonderhede in te tik. As jy soek na 'n vriend, klik HIER en gaan deur die lys en stuur 'n epos aan iemand met wie jy wil korrespondeer, so maklik soos dit! Die eerste 20 inskrywings kry elkeen 'n gratis kopie van my Tradisionele SA Resepte eBoek!

Dis doodmaklik om 'n kaartjie vir die UK Lotto te koop. Die boerpot is selde minder as R10 miljoen en gereeld naby die R90 miljoen!! Klik hier en kry jou kaartjie! Jy kan nie wen as jy nie in is nie!
Boerpotte is gereeld £5 miljoen of meer, dis darem 'n allemintige klompie Rand!
Ek het nou die dag 4 nommers ingehad, hulle betaal dit sommer aan jou per tjek in Rand!

st se  pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST:

‘n Belangrike bestanddeel in die resep van die lewe is self-dissipline. Vandag kortliks enkele gedagtes hieroor.
Daar is baie elemente en attribute wat belangrik is om jou doel te bereik en jou lewe die moeite werd te maak. Self-dissipline beslis een van die belangrikste fasette van sukses hetsy dit nou in jou loopbaan, huwelik, sport, finansieël, ‘n projek, oorkoming van ‘n slegte gewoonte, dieet of wat ookal is.

Die afwesigheid van self-dissipline lei tot frustrasie, ontevredenheid, mislukking en take wat net nooit klaar kom nie. Soveel mense begin iets, maar halfpad raak hulle verveeld met die ding, nie meer lus nie en gooi tou op.

Peter, dink ‘n bietjie aan jou lewe waar het jy gefaal en nie bereik wat jy kon nie. Miskien met ywer en geesdrif ‘n saak begin, maar toe die vasbyt en deurdruk nodig was, het jy self-dissipline gekort om vol te hou en elke dag jou deeltjie te doen.

Dis is lekker wanneer alles nog lekker en opwindende en nuut is, maar sukses word gebore in die alleenheid wanneer jy steeds doen en volhard sonder om op te gee. Beskik jy oor hierdie kwaliteit?

Self-dissipline kan jy nie koop nie. Self-dissipline word nie sommer gou aangeleer nie. Self-disspline verwerf jy oor ‘n lang tydperk van aanhou met volharding nadat jy lankal reeds handdoek wou ingooi. Self-dissipline getuig van ‘n sterk karakter en inbors. Self-dissipline kom van binne, jy kry dit nie van iemand nie.

Stel selfondersoek in – kyk na jou lewe, werk en dinge wat jy aanpak. Getuig dit van ‘n self-dissipline wat van karakter en eerbaarheid getuig?

Self-dissipline is ‘n sleutel tot sukses, die bou van karakter en die bereiking van jou potensiaal. Ek kan dit jou nie gee nie, jy moet dit verwerf. Maar wanneer jy dit verwerf het, groei jy as mens en begin jy werklik lewe.

Veel mense het aan die einde van hul lewe nie bereik wat hul kon nie, omrede hul nooit self-dissipline aangeleer het nie. Mag ek dit herhaal: ek kan dit nie vir jou gee nie, jy moet dit oor ‘n lang tyd deur jou aksie en optrede aanleer. Self-disspline is ‘n gewoonte wat jy aanleer en met tyd word dit deel van jou – deel van jou karakter en persoonlikheid.

Mag jy die genade en wysheid ontvang om self-dissipline aan te leer en deel van jou lewe te maak.

Sprankie Wysheid vir die Dag

“Die verskil tussen vervulde en onvervulde mense is self-disspline.” – Gavin Sharples 
 
Dr ST Potgieter
Tel: 021 949 5007
Sel: 083 227 3683
Epos: st@pitkos.co.za

Webwerf soeklig

My Webwerf se Soekenjin

'n Tikkie Humor

Kommunikasie probleme
'n Jong man kom een aand tuis en sy vrou omhels hom en sê " Liefie, ek het goeie nuus. Ek is 'n maand laat. Ek dink ons gaan 'n baba kry! Die dokter het my vandag getoets, maar totdat ons sekerheid kry, mag ons vir niemand sê nie."
Die volgende dag lui 'n man van die elektrisieteitsmaatskappy die deurklokkie omdat die paartjie nog nie hul rekening vereffen het nie:
"Is u mev. Smit? U is 'n maand laat, weet u?"
"Hoe weet u dit?" stotter die vroutjie.
"Wel mevrou, dis in ons leêr." sê die man van die elektrisiteitsmaatskappy.
"In julle leêr?"
"Ja, mevrou!"
"Wel, ek sal eers vannaand met my man praat." Die aand vertel sy vir haar man van die besoek.
Mal van woede storm hy vroeg die volgende oggend na die kantoor van die elektrisiteitsmaatskappy. "Wat gaan hier aan?! Dis in jul leêr dat my vrou 'n maand laat is! Hoe weet julle dit?" skreeu hy.
"Bly net kalm." sê die klerk, "dis niks ernstigs nie. Al wat jy moet doen is om ons te betaal."
"Betaal? En as ek weier?"
"Wel, meneer, dan is afsny die enigste opsie."
"En wat van my vrou?"
"Ek weet nie. Sy sal seker maar 'n kers moet gebruik."   
 

Die Resep(te)

Hierdie resep kom uit Anna Eksteen se resepte eBoek "Onthou jy nog". Vir meer oor Anna se respteboeke klik hier.

Vriende van Boeremusiek

Kalie de Jager


Tel.: 012 5485654
Faks.: 012 5485654
Sell.: 0825788907
E-pos: kalie@telkomsa.net
Webblad: http://kalie.boeremusiek.net

Die Danville Hulp Groep

Goeiemôre vriende,

Baie dankie aan almal wat bydraes vir die projek gemaak het – weet asb dat dit opreg waardeer word. Ons kon nou al sekere verpligtinge nakom en ek glo dat ons binne die volgende week weer ten volle operasioneel sal wees. NOGMAALS BAIE DANKIE!!!

Net gou bietjie terugvoer.

Voedingskemas:- Daar is ± 200 kinders wat elke middag ‘n gekookte/gebalanseerde ete moet kry. Hiervoor het ons elke dag 30kg vars vleis nodig! Asook sakke vol vars groente en vrugte. Dit is absoluut noodsaaklik dat die kinders ‘n baie goeie middagete kry WANT vir party van hierdie outjies is dit die enigste ete vir die dag! – hulle sal eers weer die volgende middag eet!

Naweke probeer ons om vir 98 gesinne noodkospakkies te gee – ‘n pakkie behels:- mieliemeel, soya, suiker, pasta,’n blikkie vleis (as ons het) olie brood en margarien (kortom – dit wat ons het kan ons uitgee)

Ons het dus altyd kos nodig! Enige kruideniersware is bitter welkom. Vleis is ‘n luukse en baie duur!. Die behoeftes vir kos is nimmereindigend.

Klere:- Daar is nou ook ‘n groot aanvraag vir klere – veral mansklere. Indien daar enige klere in jou kas is wat jy werklik nie nodig het nie – gooi maar as oor na ons toe asb. Enige goeie bruikbare klerasie en huishoudelike artikels is meer as welkom. Onthou dit is nou tyd om jou klerekas uit te sorteer en plek te begin maak vir die Splinternuwe winterskas!!!

Jeugkampe:- Ons kan nie nou kampe reël terwyl daar so ‘n groot tekort aan kos en ander middele is nie. Ons sal maar eers hiermee wag totdat die projek weer heeltemal op sy been is en dan inspring met kampe vir die kinderhuis se kinders voor die winter.

Bankbesonderhede:

Danville Hulp Projek
FNB - Brooklyn
Takkode:- 251 345
Tjek rek: 620 546 34128
Swiftkode: FIRNZAJJ926

Aflewerings adres:-

286 Cliffendale rylaan
Faerie Glen

Tel 012 991 3914 Sel 082 8282 551

E.pos - elecnet@mweb.co.za
Webwerf: www.danvillehulp.co.za Besoek asb ons webwerf vir al die nuutste foto’s.

Dit dan in ‘n neutedop - Nogmaals baie dankie aan al ons getroue ondersteuners – weet asb dat julle hulp en bystand ‘n groot verskil in ons minderbevoorregte kinders en bejaardes se lewens maak. Sonder julle kan hierdie projek nie bestaan nie!

Mooi dag
Elsabe 

Boereraat van die Week

Afrikaanse Lied

Snuffelhoekie

Soek jy plek om te gaan kampeer? Klik dan hier!

Druk jou speld op my besoekerskaart!

Kontak - Teken in/uit