Die Peter-jasie Patriot

Nommer 9

'n Passie vir Afrikaans

28 November

Die volgende is deur  Petra, wat nou in Melbourne, Ausie woon, aan my gestuur:

My Vingerafdrukke!

"Here, oral waar ek gaan laat ek vingerafdrukke na.
Op die hande wat ek aanraak, op borde, mure en boeke.
Daar is nie wegkomkans nie,
waar ek vat plaas ek 'n teken van my identiteit.

"Help my Here, om vandag waar ek ookal gaan
hartafdrukke na te laat.
Hartafdrukke van regverdigheid en deernis,
van begrip en liefde,
van barmhartigheid en belangstelling.

Hartafdrukke van hartlike vriendelikheid en
van opregte betrokkenheid.
Mag my hart 'n ander hart aanraak
en 'n afdruk van U liefde laat.

"En as iemand sou sê:
"Jou aanraking het my vandag versterk"
laat hulle agterbly met die wete dat dit
U liefde was wat hul in my ervaar het."

Afrikaans laat dit darem spesiaal klink, nie waar nie?

'n Tikkie Humor

Die karate-brak

MISDAAD vier hoogty in ’n sekere woonbuurt in die buitewyk van die stad. ’n Egpaar wat ’n huis daar laat bou het, is doodbenoud nadat by drie van hul bure se huise ingebreek is. Hulle besluit om ’n waghond te kry.

Die vrou gaan toe na die naaste troeteldierwinkel en sê: ''Kan julle my help, asseblief? Ek het ’n goeie waghond nodig.''

''Dit spyt my, mevrou,'' sê die klerk wat haar bedien, ''maar al ons waghonde is uitverkoop. Al wat ons het, is hierdie steekhaarbrakkie. Maar hy ken darem karate.''

Die vrou glo dit natuurlik glad nie, maar die winkelklerk sê: ''Karate daardie stoel!'' En die steekhaartjie storm op die stoel af en kap dit net daar in duisend stukkies.

Vervolgens sê hy vir hond: ''Karate daardie tafel.'' Waarop die hond ’n stewige houttafel bespring en dit summier in twee stukke breek.

Tevrede dat die klerk nie vir haar jok nie, koop die vrou die hond en neem dit huis toe na waar haar man wag op die groot waghond wat hy gereken het sy sou koop. Hy is skoon uit die veld geslaan -- en baie kwaad -- toe hy die steekhaarbrakkie sien.

''Maar, liefling, hy ken karate,'' probeer die vrou haar optrede regverdig.

Dog haar man wil niks verder hoor nie. ''Karate?!'' skreeu hy. ''Karate, my agterent!''

Hy lê nou al geruime tyd in die hospitaal. .

Die Resep

Brokkies

Elsabe is kliphard besig met die nodige reëlings vir die Kersboom op die 6de Desember. Hou maar die webblad en die Kersboom bladsy dop vir verwikkelinge, skakels hieronder . Komende Saterdag kom al die helpers by Elsabe bymekaar om presente toe te draai, honderde presente! Klink na pret! Meer daaroor volgende keer! ....en as iemand miskien 'n pop het wat piepie, 'n hele paar van die dogtertjies het een op hulle wenslys!

(Kersboom en kinders se wenslys) (Die Danville Hulpgroep) (Kersboom)

Ek het my eerste DVD geskryf! Het die video  wat ek in Kruger geneem het op my (nou vinnige) komper gelaai en soos 'n wafferse deskundige gekap, gesny, gelas, byklanke bygesit, titels voor en agter, hulle "scroll" ook nogal! Na die hele storie is dit toe te groot vir 'n DVD skyf, daar moet ek toe alles oordoen en nog MEER van my meesterstuk uitsny...grrrrrrrrr!
Maar uiteindelik werk dit, sit net die skyf in 'n DVD speler en siedaar! Al te oulik!

Druk jou speld op my besoekerskaart!

Kontak - Teken in/uit