Nommer 91

DIS mos Afrikaans!

14 Junie 2006

Welkom aan alle nuwe intekenare!

Kan jy 'n lekkerlees Afrikaanse storie skryf? Iets soortgelyks soos wat Minette en Estelle hieronder skryf? Stuur dit vir my aan en ek plaas dit, 'n hele paar honderd mense kry dit dan te lees en hopelik kry jy ook dan terugvoer. Wie weet, dit kan die begin wees van 'n roemryke skrywersloopbaan!

Estelle de Bruyn wat verbonde is aan die Republikein, die enigste Afrikaanse dagblad in Namibië, het die volgende aan my gestuur. Daardie land lyk tog nou so mooi na al die reën wat hulle gehad het, gaan maak gerus daar 'n draai as julle lus voel vir 'n lekker vakansie.

In alle gaval, Estelle skryf as volg:

Goggas
Estelle de Bruyn

ONS jubbel en jeug oor die heerlike reën en geniet elke oomblik wat dit sag oor Windhoek neersif. Maar daar is een ding wat ek nie mooi kleinkry van reën nie. Dit voel vir my, saam met die mildelike neerslae, reën dit ook gogga's, want waar anders kom hulle so skielik in hul hordes vandaan?

Dis krieke wat kriek en miere wat by die duisende uit die suikerpot wriemel, daar's skielik kakkerlakke in elke kas wat jy oopmaak en teen elke muur is 'n duisendpoot of drie besig om op sy eie slakkepas op te kruip.

My dierbare vriend, Marc, kom soggens doodmoeg en omge-ellie by die werk aan. Die rede: hy was skynbaar heelnag uit die slaap gehou deur 'n enkele verlore kriek wat in sy tuin, net daar naby sy kamervenster kom nesskop het. Sy eerste probleem is om die swerkater van 'n kriek op te spoor, want
wanneer hy snags in sy pajamas buite toe sluip om klaar te speel met die kriek, bly die kriek stil. Sodra hy terug is in sy bed, skree die kriek weer. Sy voorneme is dus om die kriek in te wag en sodra dié weer sy voorpootjies teen mekaar begin skuur en sy kriekgeluidjies begin maak, sal Marc soos die heks van Endor en die besetene van Gedara op hom neerdaal en uitwis. Sterkte, Marc.

In my eie huis het ek nou die nag deur die slaap badkamer toe toe gestrompelen die volgende oomblik soos 'n paalspringer in die lug opgeskiet toe my kaal voet op 'n reuse (dit smaak my meter lange) duisendpoot trap. Dis sulke tye wat jy bly is dis donker en niemand kon sien hoe rats en atleties jy jou
40 plus-jarige lyf in die lug kan ingooi nie.

Waar die verspotte klein swart miertjies ook skielik vandaan kom, weet g'n mens nie. Dis ook nie daardie langbeen bruinerige suikermiere wat ek ken nie, dis piepklein swartetjies wat in die honde se koekies en die kat se melkbak, die toe stroopblik in die kas en die suikerpot wat hoog bo op 'n rak staan, skynbaar oornag hul verskyning maak. Hulle krioel om die skottelgoed in die wasbak en loop in lang rye teen die mure uit met hul buit.

En die aaklike kakkerlakke. Moenie vir my sê dis eintlik vreeslike skoon insekkies nie, want my assosiasie met hulle is dat hulle in vuil agterstrate in die donker rondloop met hul antenna-agtige voelers in die lug, op soek na 'n asblik of ashoop of enige iets vuils.

My huis is skoon en Mathilda werk hard om al die kaste gereeld uit te was, maar na die reën, kan jy maar weet hulle verras jou en uitoorlê jou met hul alomteenwoordigheid, hetsy in die kombuis of die badkamer.
En dan snags, in die dieptes van remslaap, is daar immer die muskiet wat soos 'n torpedojaer op jou niksvermoedende slapende gesig afpeil. Maar hy peil nie net af nie, hy maak eers seker dat jy wakker is deur so entjie van jou oor af in die lug te briek en te begin zzzzzzz. As jy geïrriteerd wakker
skrik en met jou arms in die lug begin waai, ritterreer hy tot net buite jou arms se reiklengte. Sit jy uiteindelik die lig aan, is hy skoonveld. Hy is 'n uitgeslape kalant, want na jy weer die lig af het, maak hy nie dadelik sy verskyning nie. Hy wag, geduldig, gedienstig, gedweë in die donker tot jy
weer insluimer en dan, slaan hy weer toe.

Maar nou ja, as dit die prys is wat ons moet betaal vir die heerlike reën, dan is dit maar seker so en sal ek dit verduur.

Ons kampeer nogal gereeld en ek het nou besluit om 'n kampkos resepte eBoek saam te stel. Maar ek het hulp nodig, stuur vir my asseblief van julle lekker kampeer resepte en ek sit dit saam in een boek. Elkeen wat 'n kampeer resep vir my stuur kry 'n gratis afskrif van die boek sodra dit gereed is.

Ek het 'n reisigersforum begin. Enigiemand wat wil gaan rondry of pas teruggekom het van 'n lekker vakansie kan of 'n vraag vra of van hulle vakansie vertel, klik hier en gaan lees wat ander alreeds geskryf het.

Werk van die huis - ek is nou al vir 4 jaar op kierieverlof (pensioen) en in daardie tydperk het ek 'n punt gemaak om in te gaan op maniere om geld van die huis te verdien. Nie dat ek dit nodig het nie, my pensioen is oorgenoeg, maar net uit belangstelling. Nog nie iets raakgeloop wat volgens my kan werk nie. Die punt wat ek probeer maak is dat daar altyd iets te betale is voor jy die nodige inligting kan kry. daardie inligting is dan meeste van die tyd waardeloos.  Wat ek nog nie teëgekom het nie is die instansie wat so oortuig is dat hulle produk 'n sukses is dat jy eers uit jou wins uit vir hulle hoef te betaal! Ek dink nie daardie dag sal gou aanbreek nie.

Hier is die ideale geskenk vir jou vriende oorsee (en ook plaaslik!), Boererate (Home Remedies) nou as eBoek, ook in Engels! Ek stuur dit aan jou per epos en jy stuur dit dan ook per epos, geen duur posgeld om te betaal nie. Net R75 vir bykans 2000 Boererate. Stuur my epos vir betalingsbesonderhede.

Die Home Remedies is ook tesame met my Traditional South African Recipes op CD beskikbaar teen R96 (US$22) posgeld ingesluit. Sttur vir my epos vir betalingsbesonderhede.

Engelsman (67) in Londen, (grootgeword in Stellenbosch en kosskool in Wellington) onthou sy gelukkige jeugjare en wil graag iets teruggee.
As jy Afrikaanssprekend is en Londen toe kom, of inligting benodig oor Londen wat nie op Google beskikbaar is nie, is hy bereid om probeer help. Sy naam is Andrew Taylor en sy eposdres is
ampers@gmail.com.
Sy Afrikaans is egter na 52 jaar maar sleg, so in Engels asseblief.

 
Suid Afrika se Afrikaanse soekenjin

ePos Vriende - In die ou dae voor die internet het ek vele penvriende regoor die aardbol gehad. Jy moes weke wag vir 'n antwoord op jou brief! Vandag, met ePos gaan dinge sommer blitsvinnig! Mens moet egter in baie gevalle betaal om jou naam op 'n penvriend lys te kry. Ek glo nie daarin om vir vriendskap te betaal nie, dus gaan ek 'n gratis "ePos Vriende" afdeling begin. Al wat jy hoef te doen om jou gegewens op die lys te kry is om HIER te klik en jou besonderhede in te tik. As jy soek na 'n vriend, klik HIER en gaan deur die lys en stuur 'n epos aan iemand met wie jy wil korrespondeer, so maklik soos dit! Die eerste 20 inskrywings kry elkeen 'n gratis kopie van my Tradisionele SA Resepte eBoek!

Dis doodmaklik om 'n kaartjie vir die UK Lotto te koop. Die boerpot is selde minder as R10 miljoen en gereeld naby die R90 miljoen!! Klik hier en kry jou kaartjie! Jy kan nie wen as jy nie in is nie!
Boerpotte is gereeld £5 miljoen of meer, dis darem 'n allemintige klompie Rand!
Ek het nou die dag 4 nommers ingehad, hulle betaal dit sommer aan jou per tjek in Rand!

st se  pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST:

Dit alles begin met ‘n droom
Ek wil vandag vir jou ‘n baie belangrike vraag vra:

Indien jy nie ‘n droom het nie, hoe gaan jy jou drome laat waar word?

Sal jy sal saamstem, dis nogal ‘n vraag. Immers, hoe gaan jou drome waar word as jy nie drome het nie? Hoe gaan jy jou planne volvoer, indien jy nie planne het nie? Hoe gaan jy dinge bereik, indien jy nie weet watter dinge jy wil bereik nie?

Alles begin met ‘n droom.

En ek praat nie van ‘n halfhartige droom nie. Of vae drome wat jy in die newels van die nagtelike ure gelê en uitdink het nie. Ek praat van ‘n droom wat jy met jou hart en verstand anker in die diepste diep van jou siel en menswees. ‘n Droom geskryf in die warm helder sonlig van realiteit en objektiwiteit. ‘n Droom waaraan jy glo met jou hart en lewe.

Alles begin met ‘n droom.

Wat is ‘n droom? ‘n Droom is ‘n visualisering wat jy wil hê gekombineer met jou passie daarvoor. Soos ‘n vergrootglas duisend sonstrale opvang en dit deur die lens konsentreer op een punt, so vang jy menigte invloede en emosies van baie dinge op om dit deur die lens van jou menswees op een punt, naamlik “jou droom” te fokus. En daar waar die sonstrale fokus ontstaan ‘n brandpunt, instaat om ‘n vuur aan te steek. Is die invloed en strale deur jou lens so gefokus dat dit ‘n brandpunt van passie vir jou droom laat ontvlam. ‘n Passie wat jou nie met rus sal laat voordat jy jou droom uitleef en bereik nie. Indien dit nie die geval is nie, dink weer na oor jou doel en sin van jou lewe, en dit wat jy nou eintlik wil hê.

‘n Droom bestaan uit twee aspekte / komponente. Die een komponent is om iets te wil hê. Dit is dinge soos geld, besittings, huis, ‘n motor, graad of diploma of wat ookal. Die tweede komponent van ‘n droom is iets wat jy wil doen soos die Comrades te hardloop, Argus te ry, Europa te toer, Mount Everest uit te klim.

Alles begin met ‘n droom.

Ek nooi jou graag uit om my te vertel van jou droom. Skryf vir my – ons plaas dit op die webwerf, waar jy dit weer en weer kan lees. Want ‘n droom weggebêre kan vergete raak in die onderste laai en voor jy jou kom kry, is tien jaar verby en het jy nooit by jou droom uitgekom nie. Kom vertel my van jou droom, ek nooi jou uit.

Indien dit moeilik is vir jou, maak ‘n lys van drie dinge wat jy wil hê of doen en stuur dit vir my. So baie mense praat met jou, oor allerhande nonsens en dinge, maar vra hulle jou regtig uit na jou droom? Vra hulle met opregte belangstelling wat jou visie en wense in die lewe is?

Ek stel belang, deel dit met my.

Elke mens het ‘n droom. Jy het ook ‘n droom. Miskien is lê dit versteek, weggebêre onder die stoflae van daaglike roetine, pligte, aktiwiteite en derglike afleiers. Miskien het jy vergeet jy het ‘n droom. Haal jou droom uit, vee die spinnerakke af, blaas die stof af. Die tyd hiervoor is nou. Haal jou droom uit.

Alles begin met ‘n droom.

‘n Sprankie Wysheid vir die Dag

“Ek het ‘n droom.” – Martin Luther King, Jr..

Hierdie boonste aanhaling en ook betiteling van King se toespraak is seker een van die beroemdste toesprake van alle tye. Dit kom uit sy “I Have a Dream”-toespraak, gehou op 28 Augustus 1963 by die Lincoln Monument in Washington DC
 
Dr ST Potgieter
Tel: 021 949 5007
Sel: 083 227 3683
Epos: st@pitkos.co.za

Webwerf soeklig

My Webwerf se Soekenjin

'n Tikkie Humor

Die ou tannie in die kerk fluister in haar man se oor: "Ek het 'n lang sagte poepie gelos, wat moet ek doen?"
Man: "Kry nuwe batterye vir jou gehoortoestel!"

Waar di wyn en brandewyn in di mens kom, gaat di wysheid uit!

Jonas gaan vir die hernuwing van sy Swaarvoertuig Bestuurderslisensie.

TOETSBEAMPTE: Goed Jonas, kom ons toets jou algemene kennis. Jy ry teen 'n afdraend af. Voor jou is 'n ander vragmotor, wat jy wil verby gaan. Wat doen jy ?

JONAS: Is reg, Morena. Ek kyk hom die left mirror, die pad is skoon. Ek kyk hom die right mirror, die pad is skoon. Ek slaan die indicator, trap die petrol, kom buitekant, ek gaan verby.

TOETSBEAMPTE: Toe jy nou so besig is om verby te gaan, kom daar 'n ander vragmotor van voor af. Wat doen jy ?

JONAS : Isnie mulatto nie, Morena. Weer ek check die left mirror, es skoon, kyk hom die right mirror, es skoon. Sit hom die indicator to the left, vang bietie briek, dan steek ek die neus agter die ander lorry in.

TOETSBEAMPTE: Raait, maar toe jy nou in die spieel kyk, het 'n ander trok van agter die gaping toegemaak. Wat maak jy nou ?

JONAS: Dan maak ek mar Piet wakker.

TOETSBEAMPTE : Nou hoekom wil jy vir Piet wakker maak.

JONAS: Au Morena, ek dink nie Piet hy het al so moerse ongeluk gasien nie.
 

Die Resep(te)

Vir die volgende paar maande gaan ek resepte hier weergee uit die verslete ou boek wat Estelle de Bruyn vir my gegee het. Die boek is verslete met geen buiteblaaie, so ek het geen besonderhede oor die boek nie, net dat dit geel is van die ouderdom. Direspte hieronder is presies getik soos dit in die boek verskyn.

Neem koolblarekook dit op of gooi kokende water daaroor dat dit ferlep worde, haal di harde stronke daaruit, smeer elke blaar met botter of fet, maak frikkedelletjiis en bind dit toe met di koolblaar, sit dit in 'n potwat gesmeer is met vet, maak gaar, skep uit, en maak een van die souse wat hiir in di boek staan.

Gesmelte botter sous

1/2 pond botter, 1 dessertlepel meel, knypi sout, 1/2 bottel water, meng die meelen water mooi glad,sit dit in 'n kastrol, roer daarby di botter en sout, altyd een maniir omroer, laat dit 'n paar minute kook

Die volgende dis het ons Bobby se Hoender genoem. Dit was 'n gunsteling van ons toe ons in Barclays bank se enkelkwartiere in Mahalapye, Botswana gebly het. Ek sien nou weer die resep op die Voetspore webwerf, dis basies dieselle as wat Bobby vir ons gemaak het.

Die doel van ‘n eenskottelhoender is om alle met eens klaar te maak. Braai ‘n bietjie uie, en natuurlik knoffel. Sit die ander speserye na smaak by. Bietjie rissies of kerrie kan nie pla nie. Bruin dan die hoender in die uie mengsel in ‘n klein bietjie olyfolie. Sny aartappels in kleinerige stukkies, en voeg dit by. Sommer ook ‘n koppie rys of twee, en genoeg water vir die rys. Sit nou die deksel op,  en wag vir ‘n uur of so tot alles saam gaar is.
 

Vriende van Boeremusiek

Kalie de Jager


Tel.: 012 5485654
Faks.: 012 5485654
Sell.: 0825788907
E-pos: kalie@telkomsa.net
Webblad: http://kalie.boeremusiek.net

Die Danville Hulp Groep

.
Vandag skyn die son weer helder vir/oor ons projek - voel amper ek moet 'n donkerbril opsit! BAIE, BAIE DANKIE aan almal wat gehelp het om die projek weer op spoor te sit. Dankie dat ons weer kos, medisyne en klere vir ons minderbehoeftige mense kan gee! DANKIE DANKIE!

Die Mathys Roets funksie het goed afgeloop - ek dink daar was ± 200 mense en die vertoning was puik. Ons kon al ons kostes dek en daar was nog oor vir kruideniersware! = Baie dankie Walda, Ananda en Arina vir julle harde werk en puik organisasie. Dit het gehelp om die wa deur die drif te trek verlede naweek.

Die Steve Hofmeyr vertoning was ook 'n groot sukses - Ons het nog nie al die somme gemaak nie maar ek weet dat daar ook heelwat fondse sal wees vir kruideniersware ens. Baie dankie aan Wynand en Elvira wat alles georganiseer het en baie hard gewerk het.

Dit was 'n geseënde week - en vir 'n verandering helder die mense se gesigte op wanneer hulle my bakkie sien! Die vorige paar weke het dit maar baie swaar gegaan.

Ons het redelik borge vir komberse gekry en kon nou die meeste mense met tenminste 1 kombers voorsien (party was baie klein - maar ons sal later nog uitdeel soos wat dit inkom) Baie dankie ook aan almal wat hiermee gehelp het.

Ons is besig om die website op te dateer met foto's - gaan loer gerus daar en sien waar al die donasies heengaan. www.danvillehulp.co.za

Ek moet hierdie met julle deel. Ek kry 'n oproep van 'n man - hy klink nogal so bietjie streng! Wil weet wat die projek nou doen en so aan. Om 'n lekker lang storie kort te maak sê hy vir my "Ek kry jou netnou by Trade Centre dan koop ons gou kruideniers" Nou raak dit al te lekker vir my - as ek kan kos koop is my lewe volmaak! (lekker laf nê) So kry ek weer 'n oproep waar hy sê "Ek is nou daar - gaan begin solank en laai die trollie met wat jy nodig het" - Nou kyk as jy dit darem vir enige vroumens sê waag jy baie - veral vir my !!!

Ek begin toe solank en laai, en laai, en laai. 'n Jong man kom stel hom voor met nog 'n leë trollie by hom en ons laai! Kyk broers en susters so lekker het ek nog nooit "geshop" nie!!! en ek dink ook my oë het lanklaas so geblink. Ons ry uiteindelik daar weg met 2 bakkies vol kruideniersware en my hart sing "HOW GREAT THOU ART"!!

Weereens aan almal wat gehelp en donasies gemaak het BAIE DANKIE - ek kan nou nie alles op die e.mails uiteensit nie maar elke donasie is bitter belangrik en baie, baie welkom!

Onthou asb dat die kos maar gou klaar raak, dit is nie soos klere wat darem bietjie hou nie - so moet ons aaneen bymekaar maak. Die insameling kan nie stop omdat ons nou op die oomblik genoeg kos het nie. Die winter lê nog voor en ons moet voorsorg tref.

Ons medisyne rekening het ook die hoogte in geskiet. Lone moet betaal word, petrol, telefone en al die gewone uitgawes van so 'n projek.

Dit is belangrik dat ek al die goeie dinge wat met die projek gebeur met julle deel, sodat julle kan sien dat ek nooit vir hulp sal vra solank as wat ons kan aangaan en dit wat nodig is het nie. Ek sal net vra wanneer dit werklik swaar begin gaan!

Bankbesonderhede:

Danville Hulp Projek
FNB - Brooklyn
Takkode:- 251 345
Tjek rek: 620 546 34128
Swiftkode: FIRNZAJJ926

Aflewerings adres:-

286 Cliffendale rylaan
Faerie Glen
Tel 012 991 3914 Sel 082 8282 551
E.pos - elecnet@mweb.co.za
Webwerf: www.danvillehulp.co.za

PS Bel asb voor jy ry

Boereraat van die Week

Afrikaanse Lied

Snuffelhoekie

Soek jy plek om te gaan kampeer? Klik dan hier!

Druk jou speld op my besoekerskaart!

Kontak - Teken in/uit